عمري 27 سنة و لم يأتي نصيبي ... ساعدوني

مرحبا انا بنت عمري ٢٧ سنة ولهلا لسا ما اجا نصيبي بالرغم من انه تقدملي عرسان بس دائما كانت الامور ما تزبط يعني يصير مانع اما من طرفي او من طرف الشب او اهلي او اهله ، وانا دائما ماخدة الموضوع عادي بحكي كله بايد رب العالمين وبس الله يريد رح اتزوج ... وبعدين ملحقة على المسؤؤلية والبيت والولاد ، لكن هالحكي ما بعجب اهلي ودائما بحسهم بضغط وتوتر من انه ما تزوجت لهلا وكل ما يجي عريس بعملولي طواري وببلشوا يعملو معي نقاشات ومناورات وعن المستقبل وشو ممكن يصير بكرة ما حدا دايملك ومن هالحكي يعني بفتحولي موشح طويل عريض حفظتوا قد ما حكوه قدامي ، حتى صرت احس حالي كبيرة وتعديت ٣٥ سنة.

المهم مش هون المشكلة كل هاد ولا اشي ..المشكلة انه هلا متقدملي عريس اكبر مني ب ١٣ سنة وكاين متزوج وحدة لشهرين وما اتفقوا وطلقها انا بصراحة لما حكولي اهلي طار عقلي وعصبت كتير هالمرة وما قدرت اتحمل وحكيتلهم لهدرجة انا ثقيلة عليكوا لكن اهلي حكو مش هيك الموضوع بس العريس كويس وبشتغل مهندس ووضعه كويس ومحترم واقنعوني انه اوافق استقبلهم وبعدين بصير خير وفعلا اجوا لعندنا و شفتهم وشافوني هو بصراحة لما شفته مبين عليه عمره ٣٢ سنة مش اكتر بالرغم انه هو عمره ٤٠ سنة وكان هادي ورزين وكلامه مريح يعني بالاجمال كويس لكن انا مش قادرة اتقبل فكرة انه اتزوج واحد مطلق حتى لو ما عنده ولاد ويكون فرق كبير بالسن بيناتنا ... واهلي هلا ماسكيني حكي واقناع ليل نهار وبحكولي انهم شايفينو مناسب الي وانا بصراحة مش قادرة افكر من كتر ضغطهم
وشو الصح من الغلط ساعدوني مشان الله حايي راسي بده يفقع من كتر التفكير خايفة اوافق وخايفة من بكرا وخايفة من كلشي؟